مهندس الرعب

قصة " مهندس الرعب "
.
انا مكنتش عايز احكي بس هحكي قبل ما اتجنن اكتر
انا محمد عندي 28 سنه من القاهره .. متجوز وعندي طفله  ... شغال ف جريده مشهوره مش هقدر اقول اسمها .
الحكايه بتاعتي بتبدا من 8 شهور وقت لما حبيت اغير السكن بتاعي وانقل ف مكان تاني . وفعلا لقيت بس مكنتش اعرف ان كده ببدا نهايتي.
المهم اول اسبوع ف البيت عدي بسلام من غير اي حاجه ماتحصل.  بعديه علطول بدات تصرفات بنتي ريم تتغير بقت بتخاف تبقي ف اي مكان لوحدها مع العلم انها كان عندها 5 سنين ومكنتش بتخاف خالص لحد ما ف يوم ساميه مراتي كانت بتطمن عليها بس اول لما فتحت الاوضه بتاعت ريم لقتها اعده علي السرير بس مش لوحدها لا كان معاها طفل تاني عمره ميعديش ال3 سنين بس كان بضهره ساميه طبعا اول لما شافت كده فضلت مكانها شويه مش قادره تتحرك ولا تتكلم ولا تستوعب مين الي بيلعب مع بنتها ده وقررت انها تقرب علشان تشوفه واول لما قربت هو الي بصلها وشافت طفل نص وشه جلد انسان بس شاحب لونه وعليه نقط دم متجلط ونص وشه التاني زي مايكون مسلوخ مش باين منه غير اللحم والعظم طبعا هي شافت المنظر ده واغمي عليها مافاقتش غير لما سمعت صوت ريم وهي بتقول ماما ماما رحت طبعا علي الاوضه بسرعه ولقيتها واقعه جنب السرير وريم بتقولي انا صحيت من النوم لقيتها كده شلتها ودخلتها علي السرير ولما فاقت حكيتلي كل الي حصل ده
بدات اهدي  واطمنها وانا بقلها تلاقيكي بس كنتي دايخه ولا حاجه فوقعتي وحلمتي بكده حتي ريم بتقول انها صحت لقيتك واقعه جنب السرير هدت بس وقت طويييييل ونامت اخيرا بس الليله معدتش علي ه لاني بعد مانيمتها ونمت صحيت بعدها علي صوت جاي من الصاله صوت التلفزيون زي  مايكون حد اعد بيتفرج .وكمان صوت كرتون معقوله...  ريم تكون صحت ف الوقت ده بتتفرج .. وطلعت اشوف ف ايه برا بس ملقتش حد لا والغريبه كمان ان اول لما طلعت الصاله الصوت راح والتلفزيون مطفي ولا اكن كان فيه اي حاجه ...  يعني ايه !!! يمكن بحلم انا كمان ... يمكن : لا بس مش يمكن لاني سمعت صوت الحمام بيتقفل براااحه فضلت انادي واقول ريم ي ريم انتي الي جوه بس محدش رد ... دخلت اوضه ريم بس ريم نايمه قلت يمكن مراتي دخلت اوضه النوم... مراتي نايمه ف السرير !!! يعني ايه امال مين الي ف الحمام وبعدين بقي ف الليله الي مش هتعدي دي ولسه بلف وشي علشان اطلع بره الاوضه لقيتها......
ريم وهي بتقولي ايه ي بابا سمعتك بتنادي عليا .. في حاجه ؟؟.
ريم انتي كنتي ف الحمام .؟!
اه ي بابا كنت ف الحمام وداخله انام تاني يلا تصبح علي خير ودخلت الاوضه بتاعتها وقفلت الباب بس انا لما دخلت عليها من شوي كانت نايمه !!!! اللاه البيت كله بيتهيقله ولا ايه وعدت الليه علي كده تاني يوم الصبح نزلت الشغل بتاعي عادي بس نسيت اقلكوا ان انا ساكن ف عماره من 10 ادوار والسكان فيها مش كتير يعني حوالي 5 ساكنين ومكنش ليا علاقه بيهم الا جاري الحاج علي الي كان ساكن ف البيت الي قدامي بس من اول يوم جيت فيه الشقه دي وهو بيحزرني من اني اعيش ف الشقه دي بس مكنش بيقولي ليه كل لما اقله ليه بيقولي مقدرش اقلك
المهم وانا ف الشغل اليوم ده رني عليا رقم غريب واول لما فتحت سمعت صوت واحد لا صوت ولد صغير بيهمس وبيقول الحق مراتك هتولع ف البيت الحق مراتك هتولع ف البيت وقفل انا طلعت جري علي البيت ولما وصلت فتحت الباب فاجئه مراتي شافتني وقالتلي ايه ي محمد مالك ومال وشك اصفر ليه كده مقلتلهاش حاجه وجابتلي كوبايه ميه بس ريم جاتلي وعلي وشها ابتسامه بس مش ابتسامه طفله ابدا ابتسامه حد شمتان فيك وقالتلي بصوت متغير انت تسمع اي حاجه تتقالك كده ؟!وصوتها رجع زي ماهو ايه ي بابا مالك انا طبعا من الصدمه الي حصلت وريم كمان مبقتش عارف اتكلم اقول ايه وفضلت ساكت كده لحد بليل وطول النهار مراتي تسالني مالك اقلها مافيش شويه تعب بس وجيه الليل ونمت
بس صحيت علي صوت مراتي وهي بتصرخ جنبي وتقول الحقني هيموتني هيموتني نفس الطفل الي شفته بيلعب مع ريم وبيقولي لو ممشتوش من البيت بكره هيقتلني انا خايفه اوي ي محمد اعدت طبعا اهدي فيها وقالت انا هاخد ريم وهروح اعد عند ماما يومين قلتلها طيب ماتخلي ريم انا هاخد اجازه وهعد انا وهي اهو نسلي بعض شويه علي ماترجعي ووافقت والصبح راحت وسابتني انا وريم ....  اخدت ريم وخرجنا شويه ورجعنا بليل وريم نامت جنبي يومها بس المره دي صحيت من النوم بس من غير اي صوت ودخلت الحمام وانا خارج سمعت صوت حد ف المطبخ
روحت علشان اشوف مين الي جوه يمكن ريم بتجيب حاجه ولا حاجه بس اول لما دخلت لقيت ساميه مراتي نايمه علي الارض وريم ماسكه سكينه وبتقطع ف وش امها زي ما ساميه كانت وصفت شكل الطفل بالظبط كان وشها كده وقبل ما انطق واقول اي حاجه قامت ساميه من مكانها وبقوه غريبه زقتني لحد الحمام وقفلت عليا والنور قطع بعدها
وسمعت صوت ضحك لطفل مش ده صوت طفل بس كنت والله خايف منه اوي حاولت افتح الحمام معرفتش لحد ما لقيت حاجه بتمسكني من عند رجلي من تحت كده زي ما تكون ايد طفل او طفله ولحسن الحظ بسيب انا عند باب الحمام  كشاف صغير ف  علشان لو النور قطع وحد جوه يلاقيه مسكت الكشاف ونورته علي الي مسكني ولقيت طفل بس مكنش وشه مقسوم لا وشه كان محروق تمام وعينه من الحرق في واحده منهم مش موجوده ولقيته بيقولي انا هاخد بنتك ولو اعترضت او اتكلمت هعمل فيك زي كده وشاورلي علي البانيو بس وانا بوجه الكشاف للبانيو علشان اشوف بيشاور علي ايه اختفي هو
واول لما رحت عند البانيو لقيت اطفال كتير وشهم مسلوخ والي وشهم محروق بس دي كانت اجزاء اطفال كمان واول لما شفت المنظر ده النور رجع تاني بس البانيو مختفاش الي فيه ولا اي حاجه دانا كمان مع اجزاء اطفال الي موجودين والدم الي مالي البانيو كله لقيت راس ساميه مراتي وسط الأطفال دي وباب الحمام اتفتح ولقيت ريم ماسكه السكينه وهي بتقرب عليا وبتقولي هقتلك هقتلك بس دي مش بنتي ريم اكيد لحد لما وصلت عندي سحبت منها السكينه مره واحده وضربتها بالقلم اغمي عليها بعدها وشلتها لحد السرير
وطلعت برا افكر في الي بيحصل ف البيت قدامي ده لحد ما افتكرت الحاج علي لما كان بيقولي بلاش تعد ف البيت ده استنيت لحد الصبح وقلت هروح اكلمه واقله علي الي حصل معايا اكيد الراجل ده يعرف حاجه انا معرفهاش اكيد ورحتله البيت فتحلي الباب والي عرفته منه ان هو عايش لوحده علشان اهل بيته مسافرين وكده المهم اعت معاه وحكيتله علي كل الي حصل معايا وقلتله لازم دلوقتي تقولي ايه الي بيحصل ده لاكن حزرتني من البيت ده قبل كده كتير وانا مش هخرج من هنا غير لما تحكيلي انا هفقد بنتي لو انت محاكتش وفعلا بدا يحكي ويقول
من 5 سنين جه واحد اسمه جورج مع مراته وابنه كان عنده 5 سنين كنت يابني بسمع وهم بيضحكو علطول ودايما بشفهم بيخرجوا ينفسحوا لحد ما ف يوم لقيت الشقه بتاعتهم كلها بتولع طلبنا الاسعاف والمطافي والشرطه وبعد لما اطفت الحريقه ولقوا جورج ده جوه هو وابنه محروقين يابني ...  ولقيت وانا وسط الناس بنشوف الي حصل ف الشقه زي كتاب او مزكرات اخدته ورحت بيتي وبدات اقري فيه
ولقيت مكتوب فيه الاتي
كنا عايشين مبسوطين طول حياتنا مراتي دايما مش بتخليني محتأج اي حاجه وكان عندها استعداد تعمل اي حاجه علشان بس تشوفني مبسوط بس ده بغض النظر عن بعض تصرفتها الغريبه انها كانت ممكن تعد وقت طويل ف الحمام وكانت تعد وقت طويل بردو قدام المرايا وكنت لما اقلها نروح الكنيسه نصلي او اي حاجه كانت تتحجج لحد ما ف يوم جبت قسيس البيت هنا علشان ينصحها بس من وقت مادخل البيت وهي مدايقه منه من غير سبب ومكشره وغضبانه لحد لما طلع بس وهو طالع قالي تعالي وصلني ولا انت كسلان قلتله لا طبعا هاجي اوصلك واحنا ف السكه قالي مراتك مش طبيعيه فيها حاجه غريبه
ولاحظت انها حتي من اول لما دخلت من البيت وهي مدايقه من وجودي انا لازم يابني اكشف عليها ... حاول تجبهالي الكنيسه ولو رفضت انا هجيلكو تاني البيت وبعد لما وصلته ورجعت البيت لقيت مراتي مستنياني وبتقولي متخلهوش ي جورج ييجي البيت عندنا والا هزعل منك وانا عمري مازعلت منك ومن الاحسن انك متشفش زعلي لانه مش هيعجبك خالص ودخلت اوضتها بعد كده وقفلت الباب دخلت بعد كده علشان اصالحها وفعلا صالحتها ورجعت ابتسامتها زي الاول بس انا من جوايا بقول لازم ييجي فعلا يكشف عليها استنيت يوم تكون نامت  فيه واتصلت بالقسيس بس وانا بكتب الرقم بتاعه سمعت صوت غريب جاي من الحمام صوت زي مايكون حيوانات علي ناس علي صويت
اتصلت بيه بسرعه وقلته ييجي ودخلت عليها الاوضه لقيتها صاحيه واعده قدام المرايا و بتقولي كلمته بردو ...  ماشي خليه ييجي مش هتفرق.كتير وبعدها ب10 دقايق وصل ودخلته الاوضه وقلي سبنا نتكلم مع بعض شويه واستني عند الباب برا اول لما اقلك ادخل تدخل قلتله ماشي وخرجت فعلا بس بعدها بدقايق سمعت صويت مراتي وهو بيقول متدخلش غير لما اقلك متدخلش بس سمعته وبهو بيقول ايه معقوله انتي تبقي ..... وسكت وكل الاصوات اختفت بعد كده ... ولقيته خارج من الاوضه وهو بيقولي يابني اهرب لازم تهرب مراتك مش ملبوسه ولا حاجه ... مراتك تبقي جن.
مراتك تبقي جن عاشق اتجسد ف صوره انسان ..انا اتصدمت ودخت وسندني واعدني علي الكرسي وقالي وابنك لازم يموت ده ابن الانس والجن ولو كبر هيكون هلاك ليك انت ولو هربت من غير ما تقتله مش هيسيبك قلتله طب هيموت ازاي وهي مش هتسبني قالي لا هتسيبك لانها مش هتقدر تبعد عن ابنها مهما كان مكانه ..  متقدرش تمشي من غيره ... اكيد لما كانت بتخرج كانت بتاخده معاها صح؟!قلتله اه صح قالي هي دلوقتي تقدر تقول نايمه .. لازم تقتل ابنك وتهرب قبل ما تصحي علشان مضمنش هي ممكن تعمل ايه بعد ما تصحي وتعرف انك عرفت سرها
ومشي القسيس ووصلته لحد الباب وانا ف صدمه من كل كلامه وازاي هقتل ابني . اكيد ف حاجه غلط وقفلت الباب وراه وانا برجع لقيتها ف وشي وعليها نفس الابتسامه وبتقولي اكيد انت مش هتسيبني صح ؟؟؟ قول صح وانا هخليك اسعد واحد ف الدنيا دي كلها .. وانا واقف مكاني مبنطقش خالص لحد هي ماقالت ايه مش بترد عليا ليه ؟  ايه عايز تسبني !! عايزني ازعل يعني !!  وصوتها بيتغير عايزني ازعل ماشي هوريك زعلي ولقيت وشها بيتبدل لوش تاني خالص اكنها واحده تانيه غير مراتي شعرها اسود وطويل وشها ابيض وباين عليه التجاعيد وعنيها  سودا تماما...  فضلت ارجع بضهري للباب وحاولت افتحه معرفتش بس ف اللحظه دي هي بقت قدامي يعني وشها ف وشي ولقتني من غير ما احس بقول خلاص خلاص متنزعليش انا هعيش معاكي علطول ومش هسيبك خالص ...  في اللحظه دي وشها بدا يتبدل تاني لوش مراتي والابتسامه بتاعتها وقالتلي كنت عارفه ي حبيبي انك مش هتزعلني
وقالتلي انا هدخل بقي اخد دش ونطلع نسهر مع بعض .. قلتلها خلاص ماشي ودخلت اوضه المكتب بتاعتي وانا عارف انها بطول ف الحمام ..  ممكن كمان تعد اكتر من ساعه جوه وبدات اكتب المزكرات دي وتعرفوا انا هعمل ايه دلوقتي اما هدخل اولع ف نفسي وف ابني ده ..  انا كده كده مش هقدر امشي من هنا ومش هقدر اعيش معاهم تاني ..  انا هدخل اولع ف الاوضه الي هو نايم فيها ولو لقيتو المزكرات دي اعرفوا اني ولعت ف البيت وولعت ف نفسي كمان لازم توصلوا الحكايه دي لكل واحد يحاول يسكن ف البيت لانها اكيد مش هتسيب البيت ده مهما حصل واكيد هتاذي اي حد يحاول ييجي
انا خلاص قررت ورايح انفذ دلوقتي .....جورج
كمل الحاج علي كلامه وبيقول بعدها يابني بسنه بدات الناس تيجي فيه تاني بعد طبعا ماصاحب العماره عمل الشقه ورجعها تاني بس يابني كل حد كان بييجي يسكن ويبقي معاه طفل كان ابوه بيقتل الطفل ده لحد اخر ساكن كان زيك كده وجه يحكيلي علي الي حصل وبعد ما اللعنه صابت ابنه وقالي انا وديته لواحد قالي اللعنه الي عند ابنك مش هتروح غير لما تقتل ابنك وانا هقلك ترجعه ازاي ... قالي مكنش قدامي حل تاني غير اني اعمل كده انا كنت بشوف ابني بيضيع قدام عيني كل يوم قتلت ابني فعلا قتلته
وبعدها رحتله وقالي انت لازم تقتل 10 اطفال وتدفنهم كلهم ف تربه حد يكون لسه ميت قريب وساعتها ابنك هيرجعلك تاني انا مش عارف اعمل ايه اقتل ولا اسلم نفسي بس شكلي هسلم نفسي فعلا ومشي من عندي ومن بعدها مسمعتش عنه حاجه يابني .
كمل الحاج علي وقالي بص يابني الي انا شايفه انك تعمل زي ماهو كان عايز يعمل زعقتله وقلتله انت بتقول ايه ياراجل ي مجنون انت عايزني اقتل بنتي ازاي .. رد عليا وقال خلاص يابني انا غلطان .. انا حاولت اساعدك واقلك الطريقه الي تقدر ترجع بنتك بيها وتساعدها.طلعت من شقه الحاج علي وانا مش عارف اعمل ايه والشيطان بيلعب ف دماغي اني اعمل بكلامه
تعرفو انا عملت ايه ايوه ؟؟ انا قتلت بنتي ..  قتلتها وبعدها رحت للحاج علي ملقتوش ف الشقه بتاعته طلعت اسال الجيران نزلت اسال الجيران الي تحت عليه يمكن يكونوا شافوه نزل ولا حاجه ولما سالت ردوا عليا وقالو ... انت مجنون الراجل ده ميت من 5 سنين ...
يعني ايه انا كنت بكلم راجل ميت اصلا طيب هو ليه قالي كل ده مقداميش حاجه غير اني اعمل كده وفعلا قتلت 9 من ال10 اطفال انا حتي دلوقتي مع ال9 جثث ف التربه الي مفروض هيتحط فيها ال10 اطفال وبدور علي الطفل الاخير انا كتبت قصتي وقلت انشرها ف الجريده وفعلا وصلتها للجريده وهم هينشروها وخلي بالك من ابنك او اختك او اخوك او اي طفل عندك فالعيله لان لو شفته وسمحتلي الفرصه اني اقتله هقتله علشان ارجع بنتي.....