البيت

……………
روحت لصاحب البيت ومضيت العقد واتفقت معاه انه هيسلمني البيت يوم الاحد علي اساس ان النقاش يبدأ في البيت تاني يوم ع طول .
وفعلا استلمته يوم الاحد من صاحبه اقصد اللي كان صاحبه وسلمته يوم الاتنين لربيع النقاش اللي اتفق معايا اني هستلمه منه بعد شهر بالظبط ويكون فاضل ع فرحي أسبوعين .
بعد اسبوع لاقيت ربيع بيتصل بيا وبيقولي :" استاذ محمد ، تعلالي بسرعة ع بيتك عايزك في حاجة ضروري" ، روحتله ولاقيته بيقولي :" استاذ محمد انا مش هكمل شغل في البيت دة ، معلش ماتزعلش مني وماتسألنيش عن السبب وفلوسك اللي اخدتها منك عشان اجيب مون هرجعهالك ع داير المليم" !
حاولت كتير اعرف السبب بس هو كان رافض يتكلم بشكل مش طبيعي !
الفرح مش قدامه غير 5 اسابيع وكدة مش هلحق … لازم ادور ع نقاش تاني في اسرع وقت ، ابن خالي وصفلي
حسين النقاش اللي عمله شقته وشكرلي فيه جدااا هو شخص أمين وسريع ونضيف في شغله ، توكلت ع الله وقابلته واتفقت معاه ع اللي انا عايزه واتفق معايا انه هيسلمني البيت بعد شهر بردو بس المرادي هيبقى قدامي اسبوع واحد علي الفرح !
كل اول بأول الاسط ىحسين كان بيطلب مني اجيله ع البيت عشان اشوف الشغل ولو في اي حاجة مش عجباني اقولهاله عشان يلحق يعدلها ، كنت بعدي عليه 3مرات في الاسبوع ، كل مرة كنت بشوفه مولع فحم وبخور بكمية كبيرة لدرجة اني ساعات كنت بتخنق من ريحة البخور ، فسألته ؛ عن السبب فسكت شوية وقالي :"عادي ياباشا ، انا بحب ريحة البخور وفي اماكن لازم أولع فيها البخور طول مانا بشتغل فيها زي بيتك كدة " !
ماحاولتش اركز معاه ، يشم بخور ، يلفه في سجاير ، ياكله ، ماليش صالح ، اهم حاجة عندي اني استلم منه الشقة في المعاد اللي اتفقنا عليه .
قبل الشهر مايخلص بيومين كان متصل بيا عشان استلم منه البيت عشان خلاص خلصه ، بصراحة انا كنت مستغرب جداا من سرعته انا كنت فاكر مش هيلحق وهيتلكع زي باقي الصنيعية ونتخانق وشغل سيناريوهات الافلام المعروفة دي ، بس الحمدلله ربنا خيب ظني السئ فيه .
لما روحتله لاقيته ماشاء الله مخلصه وكل حاجة تمام ، اة عشان مانساش البيت دة في اول البلد قريب من الاراضي الزراعية اكتر حاجة شدتني فيه انه في مكان هادي وسعره كويس جدااااا فوق الخيال تقدر تقول انه لقطة ، البيت مكون من دورين بس فعشان كدة قررت واتفقت مع حسين اننا نفتح الشقتين ع بعض بسلم داخلي.
المهم ..لما روحت وعجبتي الشقة واستلمت المفتاح من حسين شكرته جداا وزودتله الفلوس اللي كنا منتفقين عليها شوية ، وهو ماشي لاقيته بيبصلي وبيقولي :"شكلك غلبان وابن ناس ، مين اللي دلك ع البيت دة ، دة شكله حد بيكرهك اوي"
فقولتله :"لا والله مافيش حد انا شوفته في جرنال الوسيط فعجبني سعره واشتريته ع طول ، بس لية بتقول كدة ، هو في حاجة " ؟!
فقالي :"لالا مافيش حاجة بس خلي بالك من نفسك ولو عرفت تبعيه في اقرب فرصة بيعه ع طول وماتستناش "
بصراحة استغربت من طريقة كلامه جداا بس حاولت ماهتمش واضح ان عقله اتلحس من كتر شم البخور !
المهم زوجتي جت فرشت العفش في الشقة هي وحماتي اللي حلفت ماهي دخلالنا بيت طول ماحنا عايشين في البيت دة !
بيني وبينكم انا مازعلتش أهي ارتاحت وريحت
بعد ماتزوجنا بيومين لاقيت لمياء مراتي بتسألني عن علبة الدهب بتاعتها واللي كانت شيلاها في درج التسريحة وبعد مافضلنا اكتر من ساعة بندور عليها فلاقيناها تحت السرير ، كل اللي كان ع لسان لمياء ساعتها :"اية اللي جابها هنا ؟! انا متأكدة اني حطاها في دولاب التسريحة بإيدي"
بعد فترة لاقيت لمياء بتشتكيلي انها بتشوف خيالات في الشقة وبتحس بحاجات غريبة ، طبعا كنت بقابل كلامها بشئ من السخرية واتهمتها انها بتدلع ودة خلاها تقرر تلم هدومها وتمشي تروح ع بيت اهلها لحد ما اجيبلها شقة جديدة .
لما قررت تمشي قومت لبست ووصلتها لبيت أهلها وحاولت اطيب خاطرها بس هي كانت مصممه اني لازم ابيع البيت واجيب شقة جديدة.
لما وصلتها وروحت ع البيت لاقيت النور قاطع كنت حاسس ان كل حاجة ضدي ، انا بكره الضلمة وعشان كدة كنت سايب انوار الشقة مفتوحة قبل ماننزل ، المهم فتحت الباب وكنت بحاول ادور ع شمعة عشان اولعها ع ماالنور مايجي ، كنت مشغل كشاف الموبايل وانا بدور فجأة حسيت بحاجة وقعت ع الارض جنب رجلي فجيبت نور كشاف الموبايل عليها فلاقيتها شمعة ، وقتها اخدت بعضي وجريت ونزلت من البيت ووقفت تحت ع مانور يجي ، ماعداش دقيقتين ولاقيت النور جه ،طلعت وحاولت مافكرش في اي حاجة وانام عشان لازم اصحي الصبح بدري .
وانا واقف في الصالة سمعت في اوضة النوم صوت خربشة وكإن حد ماسك مفك وبيكحت بيه ع الحيطة ، ساعتها حسيت ان في حاجة غلط وزوجتي كان عندها حق وعشان كدة ماينفعش انزل من الشقة لتأذي وقررت استجمع نفسي وادخل اشوف في اية ، الصوت لسة شغال وانابفتح نور الاوضة صوت الخربشة سكت فجأة ، لاقيت في اقل من ثانيه حاجة نطت في وشي وجريت ، طلعت قطة ، مش قادر اسيطر ع ضربات قلبي ،حاسس ان روحي كانت بتنسحب مني ، وانا خارج من الاوضة لمحت بطرف عيني كلام مكتوب ع الحيطة ، قربت من الحيطة لاقيت 4 كلمات مكتوبة علي الحيطة "ماتخافش انا مش هأذيك " الكلام كان مكتوب بالدم لدرجة ان الدم كان سايل ع الحيطة ، حاسس ان في حاجة مثبتاني قدام الحيطة مش قادر احرك رجلي ، فجأة الكلام بدأ يتمسح ويتكتب كلام تاني ، "انت مش قدامك خيار تاني ، كلهم كان قدامهم خيارات تانية وماوافقوش يساعدوني لكن انت ماقدامكش غير اختيار واحد بس وهو انك تساعدني"!
"اسمي منال ".... ��
فجأة حسيت بحاجة تقيلة خبطتني فوق دماغي وماحستش بنفسي غير وانا واقف في ارض زراعية فيها راجل في حدود حاجة واربعين وبنوتة حوالي 18سن ، وكإن ماحدش شايفني ،والراجل بيجري ورا البنت ومسكها لـ يغتصبها وفي الاخر قتلها وشالها وراح ع البيت اللي ع اول الطريق الزراعي ودخل الدور الارضي وفضل يحفر ويكسر في الارض بالفاس وحط البنت وردم عليها  ..!
فجأة فوقت ولاقيت نفسي واقف لسة قدام الحيطة ولاقيت سؤال مكتوب " هتساعدني ؟!!
في سرعة غريبة لاقيت نفسي بقول اة اة هساعدك .
حاولت احكي لمراتي وحماتي ماصدقونيش بالرغم انهم حسوا بحاجات غريبة في البيت دة قبل كدة ومفروض يكونوا مصدقني بس هما اختاروا مايصدقوش زي ماقالتلي "منال" �� وانا الوحيد اللي اختارت اصدق !
"منال" مابقتش تكتبلي حاجة تاني ،وانا يأست وقررت اصدق اللي حواليا وهو اني اكيد كان بيتهيألي ؟
صحيت من النوم ع صوت صريخ بشع نفس الصريخ بتاع منال وهي بتغتصب ،صريخ بشع وكإنها بتأكدلي انه مش بيتهيألي
تاني يوم روحت للأمين مصطفي من المعارف في القسم وفهمته اني بكتب قصة عن البلد وحابب ادعم القصة بكام جريمة او حالات اختفاء حصلت في البلد ، وفعلا طلعلي محضر من 6 شهور بأختفاء بنت عندها18 سنة اسمها منال السيد متولي عيسي ، اختفت في ظروف غامضة كانت نازلة تشتري طلبات ومارجعتش تاني واهل البلد اتهموها بأن اكيد كان عندها عشيق وهربت معاه ولحد دلوقتي ماظهرتش تاني ..
ماكنش قدامي في الوقت دة غير اني اصارح مصطفي واحكيله واشوف مفروض اعمل اية بالظبط ، ومصطفي زيه زي اى حد حكيتله ومصدقنيش بس فجأة لاقيته بيبصلي ويقولي ماقدمكش غير حل واحد بس وهو انك تهد البيت وتبنيه من اول وجديد ، لو لاقيت حاجة تبلغ البوليس لانك كنت بتبني عادي والموضوع طبيعي ، ولو مالقتش حاجة يبقى تستهدى بالله وتقتنع انه كان بيتهيألك وتبنيه من جديد عشان مراتك ترضى ترجع تعيش فيه ،لكن انت لو بلغت البوليس دلوقتي ع اساس انك شاكك بس وجم ولقوا حاجة هتدخل ف س و ج واحتمال يتهموك انك اللي قتلتها ..
وفعلا دة اللي حصل هديت البيت وزي ماكنت متخيل لاقيت جثة منال ، الغريب ان الجثة ماكنتش متحللة ووقتها البلد كلها شافتها وبلغنا البوليس ، الشرطة ماكنش قدامها غير انها تتهم صاحب البيت القديم واللي اشتريت منه البيت
المفاجأة ان صاحب البيت طلع اسمه عامر متولي عيسي !!
عمها !!!!!! وهواللي اقنع اهل منال انها اكيد هربت مع عشيقها وطفشت ، مع التحريات اتقبض علي عمها !!
من وقتها ومنال ماظهرتش تاني ،واضح انها خلاص كدة مرتاحة في قبرها
بنيت البيت من اول وجديد ومراتي رجعت البيت وخلفنا سما ، سما عندها النهاردة 5 سنين ، بعد ماطفينا شمع عيد ميلادها وفرقنا التورتة ، التورتة يادوب كفتنا احنا وقرايبنا وصحابنا اللي حضروا وخلصت ، فجأة لاقينا سما بتعيط وبتصوت وبتقول :"انا عايزة حته كمان لصحبتي " فضحكنا وقولتلها صحابك كلهم اخدوا خلاص فلاقيتها بتقولي :"لا مش كلهم ، منال قاعدة في الاوضة جوا ولسه ماخدتش ""!!